Talata 30 Desambra 2025
Tamin’ny taona fankasitrahana no nihainoako anao, ary tamin’ny andro famonjena no namonjeko anao ; indro, ankehitriny no andro fankasitrahana ; indro, ankehitriny no andro famonjena. 2 Korintiana 6:2
Io fiteny hoe „taom-pahasoavana” io dia an’ny tontolo kristiana manokana. Tamin’ny vaninandro antenatenany (taona 476 hatramin’ny 1453) izy io dia nanamarika ny fomba fanisana ny taona. Nanomboka ny 25 desambra ny taona, tamin’ny fotoana nankalazana ny fahatongavan’i Jesosy Kristy tetỳ an-tany. Rehefa noraisina ho fanombohana ny taona ny 1 janoary, dia nanjavona tsikelikely tsy nampiasaina intsony ny fiteny hoe „taom-pahasoavana”.
Nefa io fiteny io dia nilaza zava-dehibe fototra, satria mampahatsiahy antsika ny fahatongavan’ny Mpamonjy teto amin’izao tontolo izao. Jesosy tokoa mantsy dia tonga mba hitondra ny fahasoavana sy ny fahamarinana avy amin’Andriamanitra. Ny taom-pahasoavana dia manamarika fotoana iray anoloran’Andriamanitra ny fahasoavany sy ny famonjeny ho an’ny olona rehetra. Na nohadinoina aza io fiteny io, dia afaka manambara mazava isika fa mbola taom-pahasoavana ihany ny taona hifarana, satria mbola manan-kery mandraka ankehitriny ny fanambarana ny Vaovao Mahafaly nataon’i Jesosy Kristy :
„Ny Fanahin’i Jehovah no ato amiko, satria nanosotra Ahy hitory teny soa mahafaly amin’ny malahelo Izy ; naniraka Ahy hitory fandefasana amin’ny mpifatotra Izy, sy fampahiratana amin’ny jamba, hanafaka izay nampahorina, hitory ny taona ankasitrahin’i Jehovah” (Lioka 4:18-19).
Nefa hifarana ireo taom-pahasoavana ireo. Raha manao tsirambina tsy hitodika amin’Andriamanitra, dia dify io fanafahana atolotr’i Jesosy ny tsirairay io. Tsy hoe taom-pahasoavana fotsiny ihany, fa ny fiainana mandrakizay mihitsy. Tia anao Jesosy Kristy. Sokafy ny fonao hidiran’ny fahasoavany. Dieny ankehitriny dia ataovy izay hifanenanao manokana amin’i Jesosy Ilay Mpamonjy !