Alarobia 31 Desambra 2025
Fanilon’ny tongotro sy fanazavana ny làlako ny teninao. Salamo 119:105
Ho mandrakizay, Jehovah ô, no nanorenanao any an-danitra ny teninao. Salamo 119:89
Ny Teninao no fahazavako
Ny Teninao no fahazavako, Teny manazava ny saiko,
Manala sarona ny zava-miafin’ny fahasoavana ao amin’i Jesosy Kristy.
Amin’ny alalan’ireo takila masina dia mampiseho ny endriny Izy :
Miseho amin’ny hatsaran-tarehiny, ary mitondra ahy ho amin’ny hazavany.
Ny Teninao no tondrozotrako mahatoky, mitarika ahy
Lavitry ny zava-poana sy adaladala, lavitry ny andrianan’ny haizina ;
Ao amin’ny ady ataony amiko aho dia mbola mahazo vonjy amin’Ilay Boky,
Izay sabatry ny mpandresy, sabatra mafy mampandositra ilay Mpaka fanahy.
Ny Teninao no fahendreko, manokatra ny raki-tsarobidinao ho ahy ;
Tsy misy mitovy amin’ny harenany, izay sarobidy amiko mihoatra noho ny volamena.
Mihelina sy miha antitra ny zavatra rehetra etỳ, fohy, voafetra, mandreraka,
Fa ny Bokinao kosa dia maharitra mandrakizay, maharitra any an-danitra.
Ny Teninao no fifaliako, mamy tahaka toho-tantely ;
Hitombo ato amiko anie ny fifaliany ! ao anatin’ny fiadanana avy any an-danitra.
Aoka aho hianatra fanginana sy hitoetra eo amin’ny fanatrehanao,
Mba handre isanandro ny tsiambaratelon’ny fitiavanao.
E ry Teny mahatalanjona, ahitan-tsoa rehefa sokafana,
Boky feno takila mamiratra, tena an’olombelona sady tena an’Andriamanitra,
Ry mofo avy any an-danitra, ry loharano velona, hivelona amin’ny alalanao anie ny fanahiko !
Dia hamafy ny voa tsara aho, voa mameno ny tanako.
Claire-Lise de Benoît (1817-2008)