Alatsinainy 29 Desambra 2025
Noho ny habeazan’ny fampahoriana no itarainan’ny olona ; eny, minananana izy noho ny sandrin’ny mahery, nefa tsy misy manao hoe : Aiza Andriamanitra, Mpanao ahy, Izay mahatonga fiderana amin’ny alina ? Joba 35:9-10
Hitantsika omaly ny toejavatra manetriketrika momba ny Farao : tao anaty zava-mahory izy dia nitalaho tamin’Andriamanitra hanafaka azy, nefa vantany vao afaka dia nanamafy fo ary nandà tsy hankatò Azy.
Misy tantara roa hafa ao amin’ny Baiboly, maneho io fironana ratsy hanadino io, fironana matetika mpahazo antsika, raha vao nafahana isika :
— Voababona mpanjaka lehibe ny tanàna kely iray. „Ary nisy lehilahy malahelo hendry hita teo, koa nahavonjy ny tanàna tamin’ny fahendreny ralehilahy, nefa tsy nisy olona mba nahatsiahy ilay malahelo” (Mpitoriteny 9:15). Io lehilahy mahantra sy hendry io dia sary mahafinaritra maneho an’i Jesosy, Ilay Mpamonjy izao tontolo izao (Jaona 4:42). Ny fahafatesany teo amin’ny hazofijaliana no nanafaka tamin’ny fanamelohan’Andriamanitra ireo izay mino Azy ; nefa dia olona maro no manadino hitodika aminy, mba ho voavonjy.
— Josefa, namidin’ny rahalahiny ary nentina nankany Egypta, dia nampangaina tsy ara-drariny ary nampidirina an-tranomaizina (Genesisy toko faha-40). Nogadraina ihany koa ny mpitondra kapoakan’ny Farao. Nanonofy izy ary nambaran’i Josefa azy ny hevitry ny nofiny, nilaza ny hanafahana azy tsy ho ela. Nangatahin’i Josefa ilay mpitondra kapoaka mba hahatsiaro azy, rehefa tafavoaka ny tranomaizina ka ho tafaverina amin’ny andraikiny teo aloha. Nafahana ilay mpitondra kapoaka, nefa nanadino an’i Josefa. Tao anatin’ny zava-mahory nolalovany izy dia finaritra niaraka tamin’i Josefa, nefa nony afaka dia tsy mila azy intsony…
Ry kristiana, toy izany ve no ataontsika amin’Ilay Mpamonjintsika ? Niantso vonjy taminy ve isika tao anaty hamehana ? Namonjy sy nanafaka antsika ve Izy ? Hanadino Azy ve isika ankehitriny ? Aleo isika miteny hoe : „Misaora an’i Jehovah, ry fanahiko ; ary aza misy hadinoinao ny fitahiany rehetra” (Salamo 103:2).
(tapitra)