Asabotsy 27 Desambra 2025
Jesosy namaly ka nanao taminy hoe : Lazaiko aminao marina dia marina tokoa : Raha tsy ateraka indray ny olona, dia tsy mahazo mahita ny fanjakan’Andriamanitra. Jaona 3:3
Vokiso ny famindramponao nony maraina izahay, mba hihobianay sy hifalianay amin’ny andro rehetra hiainanay. Salamo 90:14
Efa nasianao fifaliana ny foko. Salamo 4:7
„Indray andro, tao anatin’ny famoizampo tanteraka aho, ary nilentika lalina indrindra tao anatin’ny fahoriako sy ny fahotako, no niseho tato am-poko tahaka tena fanambarana Kristy, ary… tampoka teo ! tsy nitovy tamin’ny teo aloha intsony ny fiainana, niova tanteraka ny fiainako : takatro fa mpanota aho, nefa nahita indray fihavaozana fahasambarana sy fiadanana, izay very fahiny… Dia fantatro, tamin’io fotoana nifanenako tamin’i Jesosy io indrindra, fa nahafoy ny zavatra rehetra ho ahy Izy, noho ny fitiavany ny fanahiko, ary nanome ahy antoka ny amina andro iray vaovao. Io andro vaovao io no andro voalohany indrindra tamin’ny famonjena ahy, ary koa ilay andro tokana tsy hay hadinoina nahitako ny tena Fitiavana. Voninahitra ho an’Andriamanitra ! noho ny fahagagana nataon’ny fitiavany tato am-poko.”
Io fijoroana ho vavolombelona io dia mampahatsiahy fahamarinana mahatalanjona : ny olombelona, rehefa miova fo ho an’i Kristy, dia mandray fiainam-baovao. Andro vaovao no misokatra aminy : amin’ny alalan’ny Fanahy Masina dia mahalala an’Andriamanitra bebe kokoa izy, afaka manompo Azy. Manomboka eo dia hitany amina fijery hafa ny zavatra rehetra, mahay mahatakatra ny sitrapon’Andriamanitra izy, ary manao am-pitiavana io sitrapony io. Mety hitoetra ho sarotra ihany ny fiainany, nefa mahita hery sy vonjy izy, eo amin’ny Mpamonjiny.