Zoma 26 Desambra 2025
Ary niteraka ny Lahimatoany izy (Maria), dia nohodidininy lamban-jaza ka nampandriny teo amin’ny fihinanam-bilona ; fa tsy nisy nitoerany tao an-tranom-bahiny. Lioka 2:7
Jesosy Kristy Tompontsika… na dia nanankarena aza Izy, dia tonga malahelo noho ny aminareo, mba hampanankarena anareo ny alahelony. 2 Korintiana 8:9
Ny tavy fanisiana vilona hohanin’ny biby, nampandrina an’i Jesosy tamin’Izy teraka, dia maneho miharihary ny fitiavantena sy hamafisam-pon’ny tontolo nakany toerana. Tsy nisy toerana ho ana olona mahantra, tao amin’ilay tranombahiny. Mpandeha trotraky ny dia an-tongotra 150 km avy any Nazareta, ilay vehivavy efa ho teraka ; tsy raharahaina izany, tsy nisy toerana ho azy ireo. Raha vahiny manan-kaja, mazava ho azy, dia ho nahitana.
Tsy isalasalana fa ny olona tao Betlehema dia tsy nahafantatra na inona na inona momba ny hamendrehan’Ilay ho teraka. Josefa sy Maria dia toa olona tena nahantra, nefa dia taranak’i Davida. Avy amin’io firazanana io no tokony hiavian’ny Mesia ; dia tonga Izy tamin’ny fotoana nambaran’ny faminaniana mialoha.
Am-panetrentena toy inona tokoa moa no nidiran’Ilay Zanak’Andriamanitra teto amin’ity tontolo ity ! Tsy vitan’ny hoe tsy nitaky ny hanekena ny zony Izy, fa nandray avy hatrany koa ny toeran’ny olona mahantra indrindra amin’ny zanak’olombelona. Izy, Ilay Andriamanitra Mpahary, mahery sy manankarena, dia te ho Ilay mahantra. Tsy nisy na inona na inona afaka nampiharihary kokoa noho izany ny fitiavan’Andriamanitra ! Ny zavatra rehetra tamin’io vanimpotoana io dia mifanohitra tanteraka amin’ny foto-kevitra manjaka eto amin’ity tontolo ankehitriny ity, izay tsy isainan’ny tsirairay afa-tsy ny hihoatra ny mpifanolo-bodirindrina aminy.
Ankehitriny, toy ny fahiny, dia any amin’io Zazakely nandry tanaty tavy fanisiana vilona hohanin’ny biby io no iantefan’ny fontsika, mba hanekentsika Ilay nambaran’ny anjely tamin’ny mpiandry ondry fahizany ho „Kristy Tompo”, sy mitondra ny anarana hoe Jesosy, izay midika hoe „Andriamanitra Mpamonjy”.