Alakamisy 25 Desambra 2025
(Hoy ny anjely tamin’ny mpiandry ondry :) Indro, milaza teny soa mahafaly aminareo aho, dia fifaliana lehibe izay ho an’ny olona rehetra ; fa Mpamonjy no teraka ho anareo anio ao an-tanànan’i Davida, dia Kristy Tompo. Lioka 2:10-11
Inona no anton’ny fiderana rehetra mameno ny toko roa voalohany ao amin’ny Filazantsara nosoratan’i Lioka ? Zazakely iray teraka tany Betlehema, tao anaty toejavatra tsy fahita. Tanteraka ny faminaniana nambaran’i Isaia, tokontokony ho 700 taona tany ho any teo aloha, hoe : „Indro, hanana anaka ny virijina ka hiteraka zazalahy ; ary ny anarany hataony hoe Imanoela (Amintsika Andriamanitra)” (Isaia 7:14).
Na dia taranak’i Davida aza ry Josefa sy Maria, dia olona tso-piaina ; tsy nahita toerana tao amin’ilay tranombahiny izy ireo, ka nampandry an’i Jesosy tao anatina tavy fanisiana vilona hohanin’ny biby. Dieny vao teraka io Zazakely io dia efa nolavin’ny fiarahamonina, nefa Izy no Ilay Andriamanitra Mpahary, tonga tetỳ an-tany tao anaty fahantrana sy tam-panetrentena. Nefa fifaliana toy inona kosa no nameno ireo izay niandry ny fiaviany, tamin’izany fotoana izany ! Anjely marobe avy any an-danitra no nampiseho ny haravoana, „nidera an’Andriamanitra nanao hoe : Voninahitra any amin’ny avo indrindra ho an’Andriamanitra ! Ary fiadanana ho etỳ ambonin’ny tany amin’ny olona ankasitrahiny”.
Anjely iray no nanambara io vaovao goavana io, tamina mpiandry ondry tsotra. Tsy nangataka andro na natahotra izy ireo —iza moa no hatahotra zazakely ? —, fa nankany Betlehema, hijery Ilay Andriamanitra tonga nofo (izany hoe nanjary olombelona) tao amin’io Zaza vao teraka io. Avy eo izy ireo dia nanambara ny zava-mahatalanjona hitany, ary nanome voninahitra an’Andriamanitra. Toy izany koa, taoriana kelin’izany, no nataona zokiolona roa tia vavaka, Simeona sy Hana, tao an-tempoly.
Ho antsika kristiana, antom-pifaliana lehibe toy inona tokoa moa ny fahaterahan’i Jesosy tetỳ an-tany, ary koa ny fandreseny teo amin’ny hazofijaliana sy ny fitsanganany velona indray ! Toy izany koa ny fisiany eo anilantsika ankehitriny, sy ny fiaviany rahampitso mba hitondra antsika hiaraka aminy any an-danitra !