Alarobia 24 Desambra 2025
(Hoy Jesosy :) Indro, Izaho momba anareo mandrakariva. Matio 28:20
Fa na aiza na aiza no iangonan’ny roa na telo amin’ny anarako, dia ao afovoany Aho. Matio 18:20
Ny fanampin’anarana hoe Imanoela dia avy amina anarana hebreo ao amin’ny Baiboly, anarana misy ny teny roa hoe ’immanuw : amintsika, sy hoe ’èl : Andriamanitra. Ny hoe ’immanuw-’el, izany, dia midika hoe : Amintsika Andriamanitra. Izany no anarana niantsoan’ny mpaminany Isaia Ilay Zaza Izay ho Ilay Mesia nampanantenaina, efa taonjato maro (Isaia 7:14). Tanteraka io faminaniana io, taonjato fito tatỳ aoriana, tamin’ny nahatongavan’i Jesosy : „Indro, ny virijina hitoe-jaza ka hiteraka zazalahy ; ary ny anarany hataon’ny olona hoe Imanoela, izany hoe, raha adika : Amintsika Andriamanitra” (Matio 1:23). Ao amin’ny Testamenta Taloha, ny mpino tany Israely dia tsy mba afaka nifaneresera tamin’Andriamanitra, Izay nonina tao amin’ny Fitoerana masina indrindra, tao an-tempolin’i Jerosalema. Koa zava-mampitolagaga loatra ny mpino niandry ny Mesia ! ny afaka nibanjina an’Andriamanitra tao amin’io Zazakely vao teraka tao Betlehema io ! Eny, Jesosy dia olona tanteraka sady Andriamanitra tanteraka. Araka izany Andriamanitra, Ilay Teny nahary ny zavatra rehetra, dia tonga nofo (izany hoe nanjary olombelona), ary „nonina tamintsika” (Jaona 1:14).
Io fampanantenana io —„Amintsika Andriamanitra”- dia afaka mampahery antsika mandritra ny taona. Naverimberin’ny Tompo izy io taorianan’ny nitsanganany velona indray sy talohan’ny nandaozany ireo apostoliny.
Tamin’ny nahafatesany sy nitsanganany velona indray, ny Tompo Jesosy dia nanokatra lalana ahafahantsika manatona malalaka an’Andriamanitra, na aiza na aiza misy antsika. Nampanantena Andriamanitra fa hiaina ao anatin’ny mpino, amin’ny alalan’ny Fanahiny (jereo 1 Korintiana 6:19-20), sady tsy handao antsika mihitsy (Hebreo 13:5). Ny Tompo dia eo anivon’ireo mpino mivory amin’ny Anarany koa, mba hitsaoka Azy sy hivavaka aminy. Te hiaraka amintsika Andriamanitra, te ho akaiky dia akaiky antsika.