Talata 23 Desambra 2025
Tsy nisy faminaniana avy tamin’ny sitrapon’ny olona, tany aloha rehetra ; fa avy tamin’Andriamanitra no nitenenan’ny olona, araka izay nitondran’ny Fanahy Masina azy. 2 Petera 1:21
Iza moa no miteny, ka dia mahatonga izany, raha tsy zavatra efa nodidin’ny Tompo ? Fitomaniana 3:37
Maro ny mikaroka porofo maha mihoatra noho ny voajanahary ny fiandohan’ny Baiboly sy maha tsindrimandry avy amin’Andriamanitra azy, porofo miorina amina zavanisy. Manome izany porofo izany ireo faminaniana efa tanteraka. Ampianarin’ny Baiboly fa ny fahatanterahan’ny faminaniana no mari-pitsarana ny fahamarinan’ireo fanambarany (Deoteronomia 18:21-22). Ny fandinihana mazava ny faminaniana sy ny fahatanterahan’izy ireo dia manamarina fa tena tsindrimandry avy amin’Andriamanitra tokoa ny Baiboly.
Anisan’ny faminaniana maro ireo momba an’i Jesosy Kristy. Isaia dia naminany hoe : „Indro, hanana anaka ny virijina, ka hiteraka zazalahy ; ary ny anarany hataony hoe Imanoela (Amintsika Andriamanitra)” (Isaia 7:14). Fitonjato taona tatỳ aoriana, ny Filazantsara nosoratan’i Lioka dia manambara hoe : „Indro, milaza teny soa mahafaly aminareo aho, dia fifaliana lehibe… ; fa Mpamonjy no teraka ho anareo anio ao an-tanànan’i Davida, dia Kristy Tompo. Ary izao no ho famantarana ho anareo : ianareo hahita Zazakely voahodidina lamban-jaza sady mandry ao am-pihinanam-bilona” (Lioka 2:10-12). Araka izany ny fiainan’i Jesosy manontolo sy ny asa nataony dia efa nambara mialoha, mampiseho ny maha zava-dehibe ho an’ny olona tsirairay ireo zava-nitranga ireo. Dia manampy izany ny Tenin’Andriamanitra hoe : „Mahatoky ka tokony hekena amin’ny fankasitrahana rehetra izao teny izao : tonga tetỳ ambonin’ny tany Kristy Jesosy hamonjy ny mpanota” (1 Timoty 1:15). Ry mpamaky, na iza ianao na iza, dia natao ho anao koa io famonjena io !