Alatsinainy 22 Desambra 2025
Ho aminareo anie ny fahasoavana sy ny fiadanana avy amin’Ilay ankehitriny sy taloha ary ho avy. Apokalypsy 1:4
Indro Izy avy amin’ny rahona… Apokalypsy 1:7
Eny, avy faingana Aho. Amena. Avia, Jesosy Tompo ! Apokalypsy 22:20
Ny Apokalypsy dia „Fanambaran’i Jesosy Kristy… nomen’Andriamanitra Azy”. Io boky io dia mahakasika, voalohany indrindra, ny Fiangonana mandritra ny tantarany, avy eo ireo fitsarana ho avy, hihatra amin’izao tontolo izao, ary farany, ny fanjakan’ny Tompo eto an-tany. Ny fiavian’i Jesosy Kristy amin’ny hoavy dia aseho amina fomba samihafa :
— Ho avy Izy : Fahiny Andriamanitra dia naneho ny fisiany feno fiandrianana tamin’ny teny hoe : „IZAHO, IZAY IZY HATRIZAY HATRIZAY KA HO MANDRAKIZAY” (Eksodosy 3:14). Ao amin’ny Apokalypsy, indroa Jesosy Kristy no tondroina ho „Ilay ankehitriny sy taloha ary ho avy” (1:4 ; 4:8). Araka izany dia Andriamanitra Izy, „Ilay ankehitriny”, tsy miova mihitsy, hatramin’ny taloha sy amin’ny hoavy. Nefa tsy voalaza hoe „Ilay hisy”, fa hoe „Ilay… ho avy”. Ho avy tokoa mantsy Izy, amin’ny fotoana voatendrin’Andriamanitra, mba hanjaka am-pahamasinana sy amin-kery eto amin’izao tontolo rehetra izao.
— Avy Aho : Ao amin’ny Apokalypsy, inefatra Jesosy no miteny hoe : „Avy faingana Aho” (3:11 ; 22:7, 12, 20), toy ny hoe manao sonia ny hafatra ara-paminaniana manontolo, sy mampahery ny tsirairay mba ho vonona. Miteny izany manokana amin’ny Fiangonany izay tiany Izy, ary mandray fitenenana mihitsy mba hanambara ny hiaviany (22:16). Ho avy Izy haka azy ary hitondra azy eo anilany, ho vadiny „malaza… masina sady tsy misy tsiny” (Efesiana 5:27).
— Avia ! : Ho valin’izany fanambarana izany, ny Fanahy Masina dia mahatonga ao amin’ny Fiangonana „vadiny” ilay vavaka fohy indrindra ao amin’ny Baiboly, hoe : „Avia” (Apokalypsy 22:17). Izany antso tonga ho azy izany dia mahatonga ny valintenin’i Jesosy hoe : „Eny, avy faingana Aho”. Farany, ny Fiangonana dia mbola miantso avy amin’ny fo hoe : „Amena. Avia, Jesosy Tompo !”