Alahady 21 Desambra 2025
(Hoy Jesosy :) Efa nomeko azy ny teninao… Manamasìna azy amin’ny fahamarinana ; ny teninao no fahamarinana. Jaona 17:14, 17
Ny alina mialoha ny nanomboana Azy teo amin’ny hazofijaliana, Jesosy dia nivavaka tamin’ny Rainy ary nihevitra ny fotoana handaozany ireo mpianany rehefa hitsangana velona indray Izy ary hiakatra any an-danitra. Efa nampanantena azy ireo „fitoerana” any an-tranon’ny Ray Izy ; efa nampanantenainy koa ny hahatongavan’ny Fanahy Masina, Ilay Mpananatra. Izy no Fanahin’ny fahamarinana, Izay hirahiny mba hiaraka amin’ny mpino mandrakizay (Jaona 14:2, 16, 17). Fa eto kosa Jesosy, rehefa nivavaka tamin’ny Rainy, dia niteny hoe : „Efa nomeko azy ny teninao.” Ho faty eo amin’ny hazofijaliana Izy, ka ny vavaka nataony, araka izany, dia karazana didim-pananana napetrany teo ampelatanan’ny Ray ho an’ireo mpianany.
Ankehitriny Jesosy dia maty sy nitsangana velona indray, nosokafana ny didim-pananana. Koa isika dia mpandova izay rehetra noraketin’i Jesosy tao, anisan’izany ny Tenin’Andriamanitra. Manomboka hatreo dia misy fifandraisana mivantana eo amin’ny lanitra sy ny tany, amin’ny alalan’ny Tenin’Andriamanitra, dia ny Baiboly. Antsika izy io, ary ho antsika. Ndao hamaky azy sy hisaintsaina izay vakintsika, mba handray izany ho antsika. Ny finoana dia avy amin’izay rentsika ao amin’ny Tenin’Andriamanitra (Romana 10:17). Arakaraka ny amakiantsika azy no itomboantsika amin’ny fahalalana ny Tompo. Ho voatarika tsikelikely ho amin’ny fahamarinana manontolo isika, mba hampihatra izany. Ary ho afaka hampita io fahamarinana io amin’ireo izay mbola tsy mahafantatra izany.
Rehefa mamaky ny Baiboly isika, dia ny Fanahy Masina, Izay nanindry mandry ireo mpanoratra samihafa ao, no hampanana antsika fifaneraserana mivantana amin’ny Tompontsika. Hampandaitra ny hafatra ampitainy Izy, hahafahantsika miaina izany. Ny Baiboly dia teny fiainana, sakafo sy loharano mitondra hery ara-panahy hanompoana an’Andriamanitra, ao anatin’ity tontolo miovaova fatratra ity, tontolo mila zavatra marobe.