Asabotsy 20 Desambra 2025
Tompo ô… eo aminao no misy ny famelan-keloka, mba hatahorana Anao. Salamo 130:2, 4
Izao no nanehoana ny fitiavan’Andriamanitra antsika : Andriamanitra naniraka ny Zanany Lahitokana tamin’izao tontolo izao, mba hahavelona antsika amin’ny alalany. 1 Jaona 4:9
Eo am-pikarohana momba ny ara-panahy i Clémence. Tamin’ny resaka nifanaovanay, vetivety foana dia nipetraka ny fanontaniana momba ny fisian’Andriamanitra. Hentitra ny teniny hoe mino izy fa misy Andriamanitra. Nanontany azy aho raha toa ka mivavaka izy ; izao no navaliny :
— Ie, hatramin’ny fahazazako, rehefa manana olana aho dia mivavaka amin’ny anjely mba hanampy ahy.
— Nahoana no tsy amin’Andriamanitra mihitsy ?
— Satria aho matahotra an’Andriamanitra. Izy no mitsara sy manasazy ; ny anjely kosa tsara fanahy, ka tsy mampatahotra ahy…
Tsy izany Andriamanitra izany no asehon’ny Baiboly. Andriamanitra dia tia ny voariny, ary Jesosy dia nampahafantatra antsika an’Andriamanitra ho Rainy sady Raintsika. Marina tokoa fa „Mpitsara marina Andriamanitra” (Salamo 7:11). Izy dia tsy Ilay „Andriamanitra bonaika be”, heverin’ny besinimaro hoe hamela faobe ny fahotan’ny olona rehetra, any am-parany. Nefa amin’ny fomba fiasany eo amin’io olona mpanota io indrindra no ianarantsika tena hahafantatra Azy. Dia Andriamanitra mahatalanjona no hitantsika. „Andriamanitry ny famelan-keloka Ianao ka miantra sy mamindra fo, mahari-po sady be famindrampo” (Nehemia 9:17). Andriamanitra dia tia ny olombelona, ka tonga hatramin’ny nanafahany azy ireo tsy hiharan’ny fitsarana sahaza ny fahotan’izy ireo, tamin’ny nanaovany sorona ny Zanany. Jesosy dia nampahafantatra antsika ny fahamoram-panahin’Andriamanitra, izay mitaona antsika hibebaka (Romana 2:4). Ndao hitoky amin’i Jesosy Kristy, Ilay Mpamonjy. Aza matahotra an’Andriamanitra isika. Ndao hanaiky hotaominy hanatona Azy, sady hanaja Azy tanteraka araka ny tokony hanajantsika Azy. Dia ho hitantsika fa ao amin’ny fahamasinany mihitsy aza, Andriamanitra dia fitiavana (1 Jaona 4:8). Ary ireo rehetra mino Azy dia anehoany ny tenany ho Ray.