Zoma 19 Desambra 2025
Jehovah ô, ampahafantaro ny farako aho, sy izay ohatry ny androko ; aoka ho fantatro fa olon-kandalo aho. Salamo 39:4
Ny 6 jona 1944 dia nisy miaramila 150. 000 lahy an’ny tafika mitambatra, niditra tany Frantsa, ka nampitsimbadika ny fandehan’ny Ady lehibe Faharoa. Eo ambonin’ny Omaha Beach no misy ny toeram-pandevenana midadasika ilevenana, ao anaty fanginana lehibe, miaramila amerikana 9000, izay maro ny mbola tsy feno 20 taona akory. Isam-potoana ny Firenena frantsay dia maneho ny fankasitrahany ireo mpiady nandatsaka ny rany ireo, nanolotra ny ainy, mba hanafahana an’i Frantsa amin’ny fahavalo, toy ny atao amin’ny „Poilus” (Voloina) —n’ny Ady lehibe Voalohany, izay voasokitra anarana eo amin’ny takela-pahatsiarovana ao Douaumont.
Tamin’ireo miaramila rehetra namoy ny ainy ireo, firy no mba efa nanolotra ny fony ho an’i Jesosy, ka manana fiainana mandrakizay ? Firy ankehitriny no misitraka fahasambarana sy fiadanana mandrakizay eo anilan’ny Mpamonjiny, rehefa avy niaritra ny tifitra variraraka ?
Mety hitsimbadika ho any amin’ny mandrakizay amin’ny ora tsy ampoizina ny fiainantsika. Iza no tsy nahatsapa ny harefon’ny olombelona, rehefa maty ny olona iray akaiky azy ? Ary ho aiza izy io ? Izany ve tsy antso mba hitodihantsika amin’ilay Andriamanitry ny aina ?
Tamin’ny volana janoary 2020 dia nisy tsimokaretina nisoko, nampahatsiahy antsika fa mety hiova haingana dia haingana ny endrik’izao tontolo izao, ary kofehy kely fotsiny no mihazona ny aintsika.
Jesosy Kristy, Ilay Mpanafaka lehibe, dia nandatsaka ny rany, nanolotra ny ainy mba hanafaka antsika tamin’ny fanandevozan’ny ota. Atolory Azy ny fonao ankehitriny ! Angamba ny anaranao tsy ho voasoratra eo amin’ny lisitry ny maherifon’ny firenena, nefa kosa ho voasoratra mandrakizay ao amin’ny bokin’ny fiainana !