Alakamisy 18 Desambra 2025
Aoka ny tenin’i Kristy hitoetra betsaka ao aminareo. Kolosiana 3:16
Tsy hohadinoiko ny teninao. Salamo 119:16
Izaho manolotra anareo ho amin’Andriamanitra sy ho amin’ny tenin’ny fahasoavany, izay mahay mampandroso. Asan’ny Apostoly 20:32
„Aza hadino ny teny” dia lohatenina lalao iray ao amin’ny fahitalavitra ; ao ny mpifaninana dia tsy maintsy mihira mivantana hira iray arahina rodoben-javamaneno, ary manohy mihira rehefa tsy miseho eny amin’ny fafana intsony ny tononkira. Ao amin’io fialamboly io ny mpilalao dia tsy maintsy afaka miantehitra amin’ny fitadidiany, mba hamenoany ny teny banga.
Fa avelantsika eo io fialamboly io sy ny fahamaivanany, fa ndao kosa handray io ohatra io mba hamakafakana ireo andinin-tSoratra Masina nomena androany.
Ao amin’ny Baiboly, izay Tenin’Andriamanitra, dia izao no voasoratra : „Koa alatsaho ao amin’ny fonareo sy ao amin’ny fanahinareo izao teniko izao, ary fehezo ho famantarana eo amin’ny tànanareo izy, ka aoka ho fehy fampahatsiarovana eo ambonin’ny handrinareo” (Deoteronomia 11:18). Hita ao amin’io teny io fa ny Tenin’Andriamanitra dia toy ny vita pirinty eo amintsika sy ao anatintsika, mba hanazava na hitari-dalana ny fitiavantsika (ny fo), ny fiainam-panahintsika (ny fanahy), ny asantsika (ny tanana), ny fahitantsika izao tontolo izao (ny maso)… Teny eo mandrakariva izany, afaka mameno ny tenantsika, teny miasa, tsy mitady afa-tsy ny ho loharanon’izay ataontsika sy heverintsika. Tsy avy amina fialamboly tsy akory izany, fa matotra sy fototra kokoa noho izany, teny mamelona sy manova ny maha isika antsika sy ny fiainana maha mpino antsika.
Ndao hotsarovana ihany koa fa io teny io dia velona sady maharitra (1 Petera 1:23), teny fahamarinana (Jaona 17:17), mifanohitra amin’ny lainga sy anjoanjo entin’ny fitenin’olombelona matetika. Ary io teny io dia manana hery hamonjy ny fanahintsika (Jakoba 1:21).