Alarobia 17 Desambra 2025
Ary hoy ny Apostoly tamin’ny Tompo : Ampitomboy ny finoanay. Fa hoy ny Tompo : Raha manana finoana na dia ohatra ny voatsinapy iray aza ianareo, dia azonareo lazaina amin’io vorihazo io hoe : Miongota, ary aoka hambolena ao anatin’ny ranomasina, dia hanaiky anareo izy. Lioka 17:5-6
Toy ny apostoly fahiny isika dia mety hahatsapa fa kely finoana, ary hilaza hoe : „Tompo ô, ampitomboy ny finoanay”. Nefa mampianatra antsika ny valintenin’i Jesosy etsy ambony : finoana „ohatra ny voatsinapy” dia ampy hampiasa ny herin’Andriamanitra, Izay te hanatanteraka zavatra lehibe.
Hoy i Hudson Taylor, misionera tany Chine (1832-1905) : „Tsy mila finoana lehibe isika, fa finoana Andriamanitra lehibe”. „Manàna finoana an’Andriamanitra”, hoy Jesosy tamin’ny mpianany (Marka 11:22).
Ny finoana dia tsy tahiry manokana efa napetraka mialoha tsy akory, ka hoe anovozana isaka izay ilaina ! Ireo tranga eo amin’ny fiainana no mitsapa azy. Mitombo ny finoantsika, arakaraka ny iantorahantsika amin’Andriamanitra, ao anaty fatokiana tanteraka Azy. Dia afaka manatanteraka ny drafitra nomaniny ho an’ny fiainantsika Izy, ary afaka misaotra Azy noho izany isika, na dia tsy ho nisafidy ny lalana asainy diavintsika aza. Isaky ny dingana tsirairay, ny finoantsika dia mihamifahatra kokoa amin’io Andriamanitra fitiavana, hendry sy mahery, io.
Ny finoana dia oharina ihany koa amina ampinga, singan’ny fiadian’ny kristiana, singa tsy azo avela, natao hamonoana ireo zana-tsipìka mirehitra alefan’i Satana, ilay Ratsy (Efesiana 6:16). Satana mantsy dia mitady hampisalasala antsika ny amin’Andriamanitra. Ny fanafana : „Tohero izy, ka miorena tsara amin’ny finoana ianareo” (1 Petera 5:9). Eny, avy amin’Andriamanitra irery ihany ny hery hanoherana ny fahavalo. Ndao hanorimpaka ny finoantsika aminy sy amin’ireo teny fampanantenany !
(tapitra)