Talata 16 Desambra 2025
Jesosy… niteny tamin’izay nanaraka Azy hoe : Lazaiko aminareo marina tokoa fa tsy mbola nahita finoana lehibe toy izany Aho, na dia tamin’ny Israely aza. Matio 8:10
Dia namaly Jesosy ka nanao taminy hoe : Ravehivavy, lehibe ny finoanao ; tongava aminao araka izay irinao. Matio 15:28
Tamina tranga maromaro Jesosy dia tsy maintsy nanome tsiny ny mpianany hoe „kely finoana”. Fa nisy olona roa kosa, nambarany ampahibemaso fa nanana „finoana lehibe”.
— Nisy kapiteny iray tao amin’ny tafika romana nanjanaka ny firenena Israely, nitalaho tamin’i Jesosy momba ny mpanompolahiny narary. Nefa nihevitra izy fa tsy mendrika handray an’i Jesosy ao an-tranony. Fantatr’io lehibe-na miaramila io fa ampy ny manome baiko, dia tanterahina izany. Toy izany koa, azony antoka fa raha manonona teny iray monja Jesosy, dia ho sitrana ilay mpanompony. Ny finoany dia nahatakatra ny maha Andriamanitra an’i Jesosy, toetra nolavin’ny Jiosy, sy ny herin’ny teniny. Izany no nahatonga an’i Jesosy nilaza marina fa mbola tsy nahita finoana lehibe toy izany Izy, na dia tao amin’ny Israely aza. Ary ho valin’izany dia nositraniny tamina teny iray ilay marary.
— Nisy vehivavy hafa firenena iray, nangataka an’i Jesosy mba hanasitrana ny zanany vavy. Nefa ny fihetsik’i Jesosy taminy dia ho nampihemotra na ireo izay sahisahy indrindra aza. Tsy noraharahainy aloha izy tamin’ny voalohany, ary toa tiany horoahina mihitsy. Nony farany Izy dia nanao teny toa nanivaiva azy. Fantatr’i Jesosy anefa fa nanam-pinoana io vehivavy io, ary hivoaka ho mpandresy amin’izany fitsapana izany. Nisisika izy, nanaiky tam-panetrentena ny tenin’ny Tompo, ary tsy niandrandra afa-tsy ny famindrampony, ho an’ireo izay tsy mendrika hahazo na inona na inona. Nahazo izao teny izao izy rehefa niala teo : „Lehibe ny finoanao”, ary sitrana ny zanany vavy, ho valin’ny finoany.
Ny nampiavaka ilay kapiteny romana dia ny fahatsapany ny halehiben’i Jesosy, Izay nandrandrain’ny finoany. Ny nampiavaka ilay vehivavy hafa firenena dia ny fahatsapany ny tsy fahamendrehany manokana ; nefa takany kosa ny loharanon-kery midadasiky ny fahasoavan’Andriamanitra.
(hitohy)