Alatsinainy 15 Desambra 2025
Ary nahoana no manahy ny amin’ny fitafiana ianareo ? Diniho tsara ny fanirin’ny voninkazo any an-tsaha… Ary raha ny ahitra any an-tsaha… no ampitafin’Andriamanitra toy izany, tsy mainka va ianareo, ry kely finoana ? Matio 6:28-30
Nahoana no saro-tahotra ianareo, ry kely finoana ? Matio 8:26
Imbetsaka ny niantsoan’i Jesosy ny mpianany hoe „ry kely finoana”.
— Ny voalohany dia nifandraika tamin’ny fanahiana momba ny filana vola aman-karena eo amin’ny fiainana andavanandro : hanina, rano hosotroina, fitafiana. Tsy hoe omen’i Jesosy tsiny ny mpianany, miahy ireo zavatra ilaina ireo. Izy mihitsy aza no naniraka azy ireo hanomana ny zavatra rehetra ho amin’ny sakafon’ny Paska. Fa ny fanahian’izy ireo momba izany zavatra izany no nanomezany tsiny azy ireo. Mampitafy ny voninkazo tsara tarehy eny an-tsaha Andriamanitra, ka tsy mainka ve hikarakara ny olony !
— Ny faharoa dia momba ny fahatahoran’izy ireo. Niatrika tafiodrivotra ny mpianatra, ary teo Jesosy, tao an-tsambokely, saingy natory ! Nivadi-po ny mpianatra, nihevitra fa tsy miraharaha ny fahorian’izy ireo Izy, ka nofohaziny (Matio 8:24-25). Nomen’i Jesosy tsiny izy ireo, noho ny fahatahorany. Avy eo Izy dia nampitony ny tafiodrivotra tamina teny indraim-bava.
— Ny fahatelo dia mifandray amina fanjohian-kevitra. Jesosy dia nampitandrina ny mpianany momba ny fihatsarambelatsihy ara-pivavahana (Matio 16:6). Nanadino nividy mofo anefa izy ireo, ary niady hevitra toy ny hoe nanome tsiny azy ireo Jesosy momba io fanadinoana io. Taloha kelin’izany izy ireo dia vavolombelon’ny nampitomboana ny mofo. Nadinon’izy ireo ve ? sa tsy takany ? fa miahy ny zavatra rehetra Jesosy.
Filana vola aman-karena, fahatahorana ny tafiodrivotry ny fiainana, fanjohian-kevitra tsy am-piheverana, isika ihany koa ve, matetika, tsy „kely finoana” ? Taomin’i Jesosy isika mba hatoky Azy bebe kokoa !
(hitohy)