Alahady 14 Desambra 2025
Efa tia anareo Aho, hoy Jehovah ; nefa hoy ianareo : Inona no nentinao nitia anay ? Malakia 1:2
Fa toy izao no nitiavan’Andriamanitra izao tontolo izao… Jaona 3:16
Ny Zanak’Andriamanitra… efa tia ahy ka nanolotra ny tenany hamonjy ahy. Galatiana 2:20
Misy gazety-boky iray namoaka sary tsy zaka jerena, nalaina tao amina akany fitaizana kamboty any amina firenena iray anjakan’ny fahantrana lalina indrindra. Ireo sary ireo dia mampiseho ankizy mahia, foana fijery, minono tanana eo am-piandrasana… hoavy manao ahoana ? Hazavain’ny lahatsoratra manaraka ireo sary, fa ny olana fototra dia tsy tena hoe ny tsy fisiana fikarakarana, fa ny tsy fisiana fitiavana.
Raha ny tena izy, io filana fitiavana io dia tsapan’ny olombelona tsirairay, dieny izy teraka ka mandra-pialany aina. Isika rehetra dia mahafantatra io filana fitiavana io, io faniriana hamboraka amin’ny hafa ny manjo io, ny hizara amina olona iray ireo tebitebintsika, na dia manontany tena tokoa aza isika hoe iza moa no mba ho afaka hanampy antsika…
Indraindray isika dia manomboka manonofinofy hoe io Andriamanitra io, Izay tsy fantatsika tsara, Izy dia ho afaka ho liana ny amintsika. Nefa isika rehefa mieritreritra ny fitondrantenantsika, izay matetika aoka izany no lavitry ny sitrapony, dia mandresy lahatra ny tenantsika hoe tsy ho afaka afa-tsy manasazy antsika Izy…
Ho afaka manasazy antsika Andriamanitra… tsia ! Manana valiny Izy : nitia antsika Izy ary nanome ny fomba hamahana ny olan’ny fiainantsika voalotona fahadisoana maro. Nirahiny ho etỳ amintsika ny Zanany Lahitokana sy malalany, Jesosy Kristy Tompo, maty teo amin’ny hazofijaliana mba hizaka ny sazin’ireo fahotantsika, avy eo nitsangana velona indray. Manambara izany mazava tsara ny Baiboly, izay Tenin’Andriamanitra. Nitia antsika tamina fitiavana toy izany Andriamanitra, ka mandodona antsika tsirairay handray manokana an’i Jesosy Kristy. Midika izany, hoe manaiky ny Tompo Jesosy ho Ilay manafaka antsika amin’ny fahamelohantsika, nefa koa amin’ny banga rehetra tsapantsika. Izy no Ilay Sakaiza mahatoky te hanome antsika fiadanana, ankehitriny, ary afaka manao izany. „Andriamanitra dia fitiavana” (1 Jaona 4:8).