Asabotsy 13 Desambra 2025
(Hoy Jesosy :) Aza malahelo ny fonareo… Ho avy indray [Aho] ka handray anareo ho any amiko, ka izay itoerako no hitoeranareo koa. Jaona 14:1, 3
Dieny niandoha ny zanak’olombelona dia tafiditra teto amin’izao tontolo izao ny ratsy, ary tsy nitsahatra nitombo. Fantatry ny kristiana ny ampianarin’ny Baiboly : hiely sy hiitatra ny lainga, herisetra ary fahapotehana ara-toe-panahy, ka hahatratra ny faratampony, mandritra ny vanimpotoanan’ireo fitsarana, vanimpotoana mampivarahontsana aorianan’ny fampiakarana ny mpino. Izany rehetra mitranga eto amin’ity tontolo ity izany dia mampalahelo ny kristiana, nefa ahatakarany koa fa efa akaiky ny fiverenan’ny Tompo Jesosy. Ny fahazoan’izy ireo antoka dia miorina amin’ireo fampanantenan’ny Tompo, voarakitra ao amin’ny Tenin’Andriamanitra, hoe : „Eny, avy faingana Aho” (Apokalypsy 22:20). Hiverina Jesosy mba hanangana ho velona indray ireo mpino efa maty, sy haka ny mpino mbola velona ; dia hiaraka aminy any an-danitra izy rehetra (1 Tesaloniana 4:16-17). Koa ny zava-mitranga eto amin’izao tontolo izao, araka ny fanazavan’ny Baiboly, dia famantarana manambara amintsika io fiverenan’ny Tompo efa akaiky io. Tsara, hoy ny apostoly Petera, ny andinihantsika ny teny faminaniana, izay manazava ity tontolo mangentana ity, „toy ny jiro mahazava ao amin’ny fitoerana maizimaizina”.
Petera anefa dia miresaka amintsika hazavana iray hafa, dia ny hazavan’ny fitarikandro (2 Petera 1:19). Io kintan’ny maraina io dia Kristy, rehefa hiseho eo imason’ny mpino Izy. Na mbola tsy hitantsika aza Izy izao, dia efa manakaiky ny fotoana hisehoany, satria „efa ho lasa ny alina, ka efa mby akaiky kokoa ny andro” (Romana 13:12). Ry kristiana, izany no fanantenantsika avy any an-danitra, dia Jesosy, Ilay Mpamonjy. Miandry Azy an-kafanampo ve isika ?
Ary ianao izay mbola mandà tsy hino an’i Jesosy Kristy, ekeo ny fanasany anao. Manatòna Azy, mba ho voavonjy. Aza mangataka andro !