Zoma 12 Desambra 2025
Ny fanahy rehetra izay tsy manaiky an’i Jesosy [tonga nofo] dia tsy mba avy amin’Andriamanitra ; ary izany no fanahin’ny antikristy, izay efa renareo fa ho avy, sady efa eo amin’izao tontolo izao sahady izy. 1 Jaona 4:3
Ho be ny fahorian’izay manova an’Andriamanitra hatakalony ny hafa. Salamo 16:4
Misy olona sasantsasany mihevitra hoe „Jesosy dia olombelona tonga nofo tamin’ny fomba miavaka indrindra”, nefa misalasala ny amin’ny maha Zanaka Lahitokan’Andriamanitra Azy. Hoy Jesosy : „Izaho dia avy amin’ny anaran’ny Raiko, nefa tsy raisinareo ; raha misy hafa avy amin’ny anaran’ny tenany, dia horaisinareo ihany izy” (Jaona 5:43). Eny, hisy iray hafa tonga, dia ilay antsoin’ny Baiboly hoe „ilay tena mpandika lalàna, ilay lehilahin’ota, ny antikristy” (2 Tesaloniana 2:8, 3 ; 1 Jaona 2:18). Heken’ny zanak’olombelona izy, ary tena hanana fahefana eto amin’izao tontolo izao. Irak’i Satana izy, ka hanohitra ny asan’Andriamanitra.
Izy dia mifanohitra tanteraka amin’i Jesosy avy any Nazareta, Ilay Zanak’Andriamanitra mihitsy, tonga olona mba hanatona antsika, azon’ny rehetra hatonina noho ny fanetrentenany sy ny fietreny ! Tonga teto amin’izao tontolo izao Izy mba hitondra ny fitiavana, ny fahasoavana, ny fangorahan’Andriamanitra, ho ana voary mijaly. Nefa araka ny nambaran’ny mpaminany, satria tsy mba nanintona ny fijery Azy ivelany, dia „natao tsinontsinona Izy ka tsy mba nahoantsika” (Isaia 53:3). Nailiky ny olona Izy, natao mitovy amina olon-dratsy, ary nohomboana teo amin’ny hazofijaliana. Nefa ny apostoly Petera dia nanambara hoe : „Iny Jesosy nohomboanareo tamin’ny hazofijaliana iny dia efa nataon’Andriamanitra ho Tompo sy Kristy” (Asan’ny Apostoly 2:36). Mandraka ankehitriny dia Izy irery ihany no anarana hany hahazoantsika famonjena (Asan’ny Apostoly 4:12). Rehefa ho avy „ilay hafa”, dia ho tara loatra vao hino. Hisy „fiàsan’ny fahadisoan-kevitra” mantsy hampanaterin’Andriamanitra ho amin’izay tsy nino ny marina, dia hino ny lainga izy ireo (2 Tesaloniana 2:11).
Ry mpamaky malala, minoa anio an’i Jesosy Kristy, Ilay Fahamarinana !