Alakamisy 11 Desambra 2025
Dia talanjona indrindra ny olona ka nanao hoe (momba an’i Jesosy) : Tsara ny nanaovany ny zavatra rehetra ; fa sady mampalady ny marenina Izy no mampiteny ny moana. Marka 7:37
[Andriamanitra] efa nanome antsika ny fahazavan-tsaina, mba ho fantatsika Ilay marina… Jesosy Kristy Zanany. Izy no Andriamanitra marina sy fiainana mandrakizay. 1 Jaona 5:20
Niteraka tsy fitovian-kevitra lehibe mandrakariva ny maha Izy Azy an’i Jesosy Kristy. Olona mahay igagana ve ? Mpahita ve ? Raha ny marina dia manana porofo maro isika, hilazana fa Jesosy Kristy dia Andriamanitra tenany mihitsy tonga olona, mba hamangy ny tany sy hanatona ny olona. Ary tsy avy amina mpino ny maro amin’ireo porofo ireo, fa avy amina tsy mino nandinika Azy, ka gaga :
— „Tsy mbola nisy olona niteny tahaka izany” (Jaona 7:46), hoy ireo mpiambina nasaina nisambotra Azy.
— „Manao ahoana ny fahendrena nomena Azy… ?” (Marka 6:2), hoy ireo nitolagaga tsy nahita afa-tsy ny maha mpandrafitra an’i Jesosy.
Ilay teraka jamba nampahiratiny, rehefa nohadihadian’ireo te hanaporofo fa mpamitaka fotsiny ihany Jesosy, dia nanao tamin’izy ireo izao fanamarihana mitombina izao : „Hatrizay hatrizay dia tsy mbola re fa nisy nampahiratra ny mason’izay teraka jamba. Raha tsy avy amin’Andriamanitra izany Lehilahy izany, dia tsy mahefa na inona na inona Izy” (Jaona 9:32-33).
Ny fitsanganan’i Kristy velona indray, nohamarinina vavolombelona maherin’ny 500, dia porofon’ny nambarany, Izy tenany mihitsy, hoe : „Izaho no fananganana ny maty sy fiainana” (Jaona 11:25). Iza tamin’ireo nilaza ny tenany ho nirahin’Andriamanitra no nitondra porofo tahaka izany ? Nametraka izao fanontaniana izao tamin’ny mpianany Jesosy : „Fa ianareo kosa, manao Ahy ho iza ?”
Ndao hamaly toa an’i Petera hoe : „Ianao no Kristy, Zanak’Andriamanitra velona” (Matio 16:15-16).