Alarobia 10 Desambra 2025
(Hoy Jesosy :) Ao an-tranon’ny Raiko… handeha hamboatra fitoerana ho anareo Aho. Ary raha handeha hamboatra fitoerana ho anareo Aho, dia ho avy indray ka handray anareo ho any amiko, ka izay itoerako no hitoeranareo koa. Jaona 14:2-3
Nangotraka ny ady tany amin’ny faritra atsinanan’i Afrika, nandritra ireo taona 1990. Nisy miaramila iray naratra teo amin’ny tongony, ary nentina tany amina toeram-pitsaboana lavitry ny fonenany. Rehefa avy nijanona ela tao am-pandriana izy, dia afaka nikotringa indray, nitondra tehina.
Avy eo dia nahazo baiko izy hody any amin’ny fireneny, ka niditra tao an-daharan’ny miaramila maratra. Nandritra io dia an-tongotra lavitra io dia nangoraka azy matetika ny namany, satria sahirana izy nanaraka ny laharana. Amin’izay dia nasehony ny tahon’ilay tehiny. Nataony soratra sokitra teo ny teny hoe : „Twende setu”, midika hoe : Andeha hody any an-trano isika !
Ny fisaintsainana ny tany niaviany dia nanome hatrany hatrany herim-po vaovao sy tanjaka vaovao an’io lehilahy io. Dia afaka niroso niaraka tamin’ny mpandeha izy, ary nihananatona ny akany niriny fatratra, isanandro isanandro.
Izany koa ny fanantenan’ny kristiana : na lavitra aza ny lalana, dia matoky izy fa ho tonga any an-trano, eo anilan’i Jesosy. Afaka miaina hatramin’ny 80 na 90 taona isika, tsy maninona izany, fa ny tena zava-dehibe dia ny tanjona —hiaraka amin’i Kristy ao an-tranon’ny Ray. Eny, ho tonga any an-trano isika. Na, ny kristiana handalo fahafatesana, mba hahatongavany any amin’io trano io ; na, ny Tompo hampiakatra azy rehefa hiverina haka ny Fiangonany, izay azony tamin’ny vidiny lafo aoka izany ; samy miandry izany fotoana izany am-pifaliana isika rehetra.
Ho sarotra angamba ny lalana mandra-pahatonga any, nefa izany no lalana itondran’Andriamanitra antsika. Ny fahasoavan’Andriamanitra sy ny heriny irery ihany no nitarika antsika hatramin’izao, ary ampy io fahasoavany io, hiaraka amintsika hatrany am-paran’ny dia.