Talata 9 Desambra 2025
Ry rahalahy, mivavaha ho anay, mba handehanan’ny tenin’ny Tompo faingana ka hankalazaina toy ny eo aminareo. 2 Tesaloniana 3:1
Atsipazo eny ambonin’ny rano ny haninao, fa ho hitanao ihany izy rehefa ela. Mpitoriteny 11:1
Nandritra ireo taona 90 dia nisy misiona kristiana iray tany Azia atsimo, namoaka petadrindrina natao mba hampirisihana hivavaka ho an’ny mpino any Chine. Naroso tany Frantsa io petadrindrina io, nandritra ireo fivoriana fampahalalana ny Fiangonana enjehina. Ilay petadrindrina dia mampiseho sary tsara tarehy ahitana ankizy sinoa vitsivitsy eny an-dalana, tany amina tanàna kely ao amin’io firenena midadasika io : sarin’ankizy folo eo ho eo, ao anaty mponina arivo tapitrisa any ho any.
Taona vitsivitsy tatỳ aoriana dia nandeha tany Etazonia i Jim, mpikambana iray ao amin’io misiona io. Nanomboka nisokatra ny sisintanin’i Chine, na dia mbola nisy hatrany aza ny fanenjehana, tany amin’io firenena io. Indray andro, nandeha fiara izy ary nahita tovovavy sinoa teo amoron-dalana, manakana fiara hitondra azy. Noho ny fitiavany an’i Chine, dia tsy afaka ny tsy hijanona izy.
Teny an-dalana dia faly i Jim nahafantatra fa kristiana io olona io, ary afaka nifindra monina any Etazonia. Noresahiny azy ny misiona misy azy sy ny anjara asany eo amin’ny fanampiana ny kristiana any Chine. Mba hanaporofoany izany dia nijanona izy, ary namoaka avy tao anaty poketrany ny sarin’ireo ankizy nalaina kisendrasendra, sarin’ilay petadrindrina fitaomana hivavaka.
Nijery ny sary ilay tovovavy, nanondro iray tamin’ireo ankizy ary nihoraka hoe : „Izaho ity !”.
Fampaherezana toy inona moa izany ! ho an’i Jim… ary ho antsika ihany koa. Ndao hafana fo hivavaka ho an’ny mpino any amin’ireo firenena tsy azon’ny Filazantsara idirana. Ny Andriamanitsika dia Ilay „Mpihaino vavaka” (Salamo 65:2).
(araka an’i M. Varton)