Alatsinainy 8 Desambra 2025
Aza mamihina ny soa amin’izay tokony homena azy, raha azon’ny tànanao atao ihany ; aza manao amin’ny namanao hoe : Mandehana, ka avia indray, fa rahampitso no homeko ; kanefa manana ihany ianao. Ohabolana 3:27-28
Isika ve mahafantatra zokiolona tsy misy enti-manana hanakaramana olona hanadio ny tranony, na mpiara-monina tsy afaka miantoka ny fianaran’ny zanany ? Raha afaka manampy ireny olona ireny isika, na ara-bola na amina fanampiana hafa, dia andraikitsika ny mizara. Nahoana moa ? Ao amin’ny andinin-tSoratra Masina androany, ny hoe „izay tokony homena azy” dia midika fa manana adidy isika amin’ny olona mila fanampiana.
An’Andriamanitra izao tontolo izao. Raha omeny fananana ara-karena isika, na fahaizana, na fanomezana ara-panahy, dia tsy midika tsy akory izany hoe antsika ireny fanomezana ireny. Tokony hitantana ny fananan’ny tompony araka izay itiavany izany isika. „Samia mifanompo araka ny fanomezam-pahasoavana izay noraisinareo, dia tahaka ny mpitandrina tsara ny fahasoavana maro samihafa izay an’Andriamanitra” (1 Petera 4:10).
Ny eveka Basile Lehibe (329-379) hono dia niteny hoe : „Ny mofo tehirizintsika dia an’ireo izay noana, ny akanjo mafana ao anaty fitoeran’akanjontsika dia an’ireo izay mitanjaka, ny volamena nafenintsika… dia an’ireo izay sahirana. Koa isaky ny nanana fotoana tandrify hanampiantsika ny hafa isika, nefa nandà tsy hanao izany, dia nitondra fahavoazana ho azy ireo.”
— Tompo ô, ny fiarahamonina dia manome toky ahy hoe ahy ny fananako rehetra, nefa takatro izao fa diso izany. Ataovy resy lahatra ny amin’izany fahadisoana izany aho, mba hahafahako manara-dia Ilay Zanakao : nizara tsy nitsitsy ny harenany Izy, ho an’ny hafa (2 Korintiana 8:9).
(tapitra)