Alahady 7 Desambra 2025
Ary ianareo, izay efa matin’ny fahadisoana… dia novelominy (novelomin’Andriamanitra) niaraka tamin’i Kristy, rehefa navelany ny fahadisoantsika rehetra ; ary novonoiny ny sora-tànan’ny didy izay niampanga antsika ; dia nesoriny… izany ka nohomboany tamin’ny hazofijaliana. Kolosiana 2:13-14
Ny olona dia nomena fieritreretana, ka manindrimandry azy tsara fa izay ratsy atao dia mety hahitany fahasahiranana, ary mety hitondra azy eo amin’ny fitsarana mihitsy aza. Noho izany izy dia mirona hanomana fiarovan-tena na hitady fialan-tsiny… sao tsy maintsy hampamoahina eo anatrehan’Andriamanitra ! Ny fivavahana, fitsipi-pitondrantena, filôzôfia, tsikera atifanahy, dia samy mihambo hanafaka na hanamaivana ireo fahadisoana, ary hanamarina azy ireo aza, indraindray. Ary rehefa sarotra lavina izy ireo, dia ezahina onerana ; ny fifadian-kanina, vavaka, fihatahana masina, asa fivalozana, asa soa, fandavantena hanao asa sosialy na fiantrana, dia samy fomba antenaina ho afaka „hampifandanja ny mizana”-n’ireo fahadisoantsika, amin’ny andro tsy maintsy hampamoahana antsika momba ny fiainantsika. Tsy mba toy izany anefa no fahitan’Andriamanitra ny zavatra. Ny fahadisoana iray, na inona na inona, dia tsy maintsy tsaraina, melohina ary sazina. Hoy ny Baiboly : „Tsy misy marina, na dia iray akory aza” (Romana 3:10). Eo ambany fanamelohana tsy azo ihodivirana ny olona, ka tsy hanova na inona na inona amin’izany ny ezaka ataony.
Tsy izany ihany anefa no lazain’ny Baiboly… Ambarany antsika fa Andriamanitra dia tia ireo izay tsy maintsy hotsarainy ; nitia azy ireo Izy, ka nanomana ny zavatra rehetra hahafa-trosa azy ireo. Nomelohiny i Jesosy, nisolo toerana azy ireo teo amin’ny hazofijaliana, ka ankehitriny dia afaka amin’ny fiampangana rehetra izy ireo, raha mitoky amin’Ilay nisolo toerana azy ireo, hanefa ny trosany.
Raha toa ianao mandraka androany mbola nieritreritra fa manana tohan-kevitra haroso eo anatrehan’Andriamanitra, ho fiarovana anao amin’ny andro fitsarana, dia afoizo avokoa ireny, ary arosoy Azy ilay hany tohan-kevitra ekeny, dia hoe : „Mino an’i Jesosy maty hamonjy ahy aho”.