Asabotsy 6 Desambra 2025
Efa nafoiko ilay trosa rehetra taminao, satria nifona tamiko ianao ; moa tsy tokony mba ho namindra fo tamin’ny mpanompo namanao koa va ianao, tahaka ny namindrako fo taminao ? Matio 18:32-33
Aoka samy… hifamela heloka, tahaka ny namelan’Andriamanitra ny helokareo, ao amin’i Kristy. Efesiana 4:32
Jesosy dia nampitsimbadika ireo fehezan-dalànan’ny fiarahamonina jiosy tamin’ny vanimpotoana niainany teto an-tany, rehefa nampianatra mba tsy hamaly faty, na tsy hangataka an’Andriamanitra hamaly faty ho antsika akory aza. Mifanohitra amin’izany, mangataka aza Izy mba hamela heloka, ary hamela heloka amin’ny fo manontolo.
Ny famelan-keloka dia tsy mitovy amin’ny famitranam-pihavanana. Fantatsika tsara fa ny fiainana andavanandro mahazatra indrindra dia feno fanaratsiana, fandratrana. Ny hoe mamitram-pihavanana dia ny miaraka indray, aorianana tsy fifanarahana. Nefa mialoha izany dia tokony hisy tena famelan-keloka.
Ho an’ny kristiana, ny mamela heloka, voalohany indrindra, dia mitaky fiekena fa nahazo famelan-keloka tsy hita fetra isika. Namela heloka antsika Andriamanitra, noho ny fahafatesan’i Kristy teo amin’ny hazofijaliana, ary nanafaka antsika tamin’ny fahafatesana, izany hoe tamina toeram-pahaverezana lavitra Azy, sady nanome antsika ny fiainana mandrakizay.
Ny famelan-keloka izany dia avy amin’Andriamanitra, ary izay mamela heloka ny hafa dia mikatsaka ny ho araka izay andrasan’Andriamanitra aminy. Ny kristiana mahatsapa ny famelan-keloka nomen’Andriamanitra azy, ary mamela heloka ny hafa, dia manatanteraka asa mampiseho taratra ny fahasoavan’Andriamanitra.
Ny famelan-keloka dia tsy hoe ahafahana manatsara ny fifandraisan’ny samy olona fotsiny, sy mihoatra ireo fanafintohinana sy ratra. Ny hery mitarika azy dia ny fitiavana, izay „tsy manao otripo… mandefitra ny zavatra rehetra… maharitra ny zavatra rehetra” (1 Korintiana 13:4-7).
Raha toa mananosarotra amintsika ny mamela heloka, dia satria matetika tsy takatsika ny habe tsy misy fetran’ny famelan-keloka avy amin’Andriamanitra. Nefa tsy maintsy mahatakatra izany isika, mba hiroso ao amin’ny lalan’ny famelan-keloka.