Alatsinainy 4 Aogositra 2025
Ny anankiray tamin’ny roa ambin’ny folo lahy, atao hoe Jodasy Iskariota, dia nankao amin’ny lohan’ny mpisorona ka nanao hoe : Homenareo ohatrinona aho, hanolorako Azy aminareo ? Ary izy nandanja sekely volafotsy telopolo homena azy. Matio 26:14-15
Fantatra tsara ny anarana hoe Jodasy, dia ny anaran’ilay mpamadika. Jodasy dia nofidin’i Jesosy, toy ireo apostoly hafa, ary nanaraka Azy nandritra ny telo taona. Nefa rehefa tany Jerosalema i Jesosy, dia nankany amin’ny mpitondra ara-pivavahana i Jodasy ary nanaiky hitoroka Azy amin’ny vola telopolo.
Nandritra ny sakafo hariva farany niarahany tamin’ny mpianany dia nanambara tampoka Jesosy hoe : „Ny anankiray aminareo no hamadika Ahy”, ary avy eo dia nanolotra sombin-kanina an’i Jodasy, mba hanondroany azy ho ilay mpamadika. Dia nivoaka tamin’ny alina Jodasy (Jaona 13:21-30). Taorianan’ny sakafo dia nankany amina saha iray akaikin’i Jerosalema i Jesosy sy ny apostoly iraika ambin’ny folo lahy. Nony sasakalina dia nisy vahoaka be nirongo sabatra sy langilangy, nipoitra tampoka. Niaraka tamin’izy ireo i Jodasy ; nandroso izy, nanatona an’i Jesosy, ary nanondro Azy tamina oroka (Matio 26:47-49). Nandositra ireo apostoly hafa, ary voasambotra Jesosy : hohelohina Izy ary hoentina eo amin’ny hazofijaliana. Jodasy kosa dia hamerina ny vola ary hananton-tena…
Taorianan’ny niakaran’ny Tompo Jesosy any an-danitra, ny apostoly dia nahita, tao amin’ny Soratra Masina, lahatsoratra manambara ny anjara asa mampalahelo nataon’i Jodasy, sy milaza ihany koa fa tokony hosoloina izy. Koa nangatahin’izy ireo ny Tompo hitari-dalana azy ireo, dia ny apostoly Matiasy no voatendry (Asan’ny Apostoly 1:26).
Manetriketrika ny ohatra momba an’i Jodasy. Ambaran’ny Baiboly fa nitana ny kitapo iombonan’ny mpianatra izy, ary mpangalatra (Jaona 12:6). Na dia efa niaraka tamin’i Jesosy nandritra ny telo taona aza izy, ary nisitraka ny fitiavany tsy tapaka, dia mbola nangatsiaka hatrany ny fony, nohamafisin’ny fitiavam-bola.
(tapitra)